Gert er ráð fyrir að hefjast handa eftir áramót við að grafa einskonar þró á botni Hafrahvammagljúfurs, undir enda rennunnar sem flytur vatn af yfirfalli Hálslóns niður í gljúfrið. Þessari framkvæmd verður flýtt vegna þess að lítill snjór er á svæðinu og því vel gerlegt að athafna sig við verkið.

Grafnir verða um 50.000 rúmmetrar úr gljúfurbotninum og komið fyrir neðan við væntanlega gljúfurstíflu sem reist verður sumarið 2009 . Steypt verður í botn þróarinnar og síðan myndast þarna djúpur hylur sem tekur við yfirfallsfossi síðsumars ár hvert og dregur úr afli hans. Ef tíðarfar verður nógu hagstætt í janúar til að unnt sé að grafa vatnsþróna flýtir það fyrir verkum sem ætlunin er að ljúka áður en Hálslón fyllist og vatn tekur að renna á yfirfalli, sem að líkindum gerist snemma í ágúst.

Starfsmenn Ístaks hafa undanfarnar vikur unnið að því að flytja ríflega 100.000 rúmmetra af grjóti til í gljúfrinu, eftir að bergfylla á austurbakkanum neðan Kárahnjúkastíflu hrundi að stórum hluta. Það sem eftir stóð af bergfyllunni var síðan sprengt niður.