 Starfsmenn Ístaks hf. keppast við að flytja grjótmulning til á botni Hafrahvammagljúfurs eftir að sprengd var bergfylla gegnt enda yfirfalls Hálslóns neðan við Kárahnjúkastíflu. Ef ekkert óvænt kemur upp lýkur verkinu fyrír jól.Þetta er lokaverkefnið á virkjunarsvæðinu í ár. Frá upphafi framkvæmda var vitað að djúp sprunga væri í bergi á austurbakka gljúfursins neðan stíflu, samsíða gljúfrinu. Stöðugt var fylgst með hreyfingum í berginu með mælitækjum og í ágúst 2008 víkkaði sprungan umtalsvert eftir að vatn fór að renna á ný á yfirfallinu. Snemma í október hrundi bergfyllan að hluta og þá lá fyrir að sprengja þyrfti afgang hennar til að tryggja öryggi þeirra sem ættu eftir að vinna í gljúfrinu sumarið 2009.
Það sem eftir stóð af bergfyllunni var sprengt í vetur í tveimur áföngum, alls 20.000 rúmmetrar. Fyrri sprengingin var í byrjun nóvember en sú síðari núna um miðjan desember.
Byrjað var að flytja efnið upp úr gljúfrinu 11. nóvember og á vöktum fra 25. nóvember. Afköstin eru 5.000-7.000 rúmmetrar á sólarhring. Núna um miðjan desember höfðu um 75.000 rúmmetrar verið fjarlægðir og fluttir til um 400 metra, niður fyrir stæði stíflunnar sem reist verður í gljúfrinu.
Sumarið 2009 verður steypt í botn gljúfursins, undir yfirfallsrennunni, og sett upp grjóthleðsla eða stífla skammt þar fyrir neðan til að vatn safnist í einskonar þró og dragi úr afli í Kárahnjúkafossi sem til verður að jafnaði síðsumars þegar Hálslón er fullt.
|
