Vatnsborð Hálslón var í dag komið í 562,2 metra og hafði hækkað um tæplega 60 sentimetra á sólarhring, sem er tífalt meira en að jafnaði í síðustu viku. Skýringin er að sjálfsögðu asahlákan á landinu öllu með tilheyrandi vatnavöxtum.

Byggingarvinnu er nú að heita lokið í stöðvarhúsi Kárahnjúkavirkjunar í Fljótsdal og vinnu við vél- og rafbúnað miðar vel áfram. Prófanir eru þegar hafnar á ýmsum hjálparbúnaði og stjórnbúnaði í bæði stöðvarhúsinu og stjórnstöðinni í þjónustubyggingu Fljótsdalsstöðvar.

Merkur áfangi náðist fyrir helgi þegar orkusviði Landsvirkjunar var afhent fyrsta fullbúna mannvirki Kárahnjúkavirkjunarinnar en það er þjónustubygging, eða hlaðhús, Fljótsdalsstöðvar.

Gestir í kynningarmiðstöð Landsvirkjunar í Végarði í Fljótsdal voru yfir 16.000 talsins í sumar og fjölgaði um hátt í 35% frá sama tímabili árið 2005. Dæmi eru um að skipuleggjendur ferða um Ísland hyggjast gera virkjunarsvæðið að föstum áningarstað sumarið 2007.

Undanfarnar vikur hefur átt sér stað fjölgun vinnuslysa hjá ítalska verktakanum Impregilo sem annast framkvæmdir við tvo stærstu verkþætti virkjunarinnar, byggingu Kárahnjúkastíflu og gerð aðrennslisganga.

Starfmenn framkvæmdaeftirlitsins við Kárahnjúka tóku sig til eina kvöldlstund núna í vikunni og skáru laufabrauð af miklum móð. Í hópum eru fulltrúar margra þjóða og það kom að sjálfsögðu í hlut Íslendinganna að kenna hinum réttu handtökin.

Lokið er við að steypa vatnskápu Kárahnjúkastíflu við hlíð Fremri-Kárahnjúks. Þá er ekki annað eftir af þeim verkþætti en bláendi kápunnar efst á hinum enda stíflunnar.

Sérhæfður undirverktaki vinnur að því að grunnmála fallgöng Kárahnjúkavirkjunar og ber síðan á þau slitsterka málningu. Að því verki loknu verða göngin tilbúin til notkunar.

Vatnsborð Hálslóns var í dag komið í 560,8 metra yfir sjávarmáli. Mesta dýptin næst Kárahnjúkastíflu er um um 107 metrar.

   Prófun á botnlokum Hálslóns gekk samkvæmt áætlun í dag og búnaðurinn reyndist í alla staði eins og ráð var fyrir gert. Lokunum var rennt frá í fyrsta sinn frá því byrjað var að safna vatni í Hálslón 28. september og nú verða þær ekki hreyfðar aftur fyrr en í fyrsta lagi næsta sumar, ef talið verður nauðsynlegt að hægja þannig á hækkun lónborðsins í vatnavöxtum.

Kínverski borstjórinn á bor 3 við Kárahnjúka var að vonum innilega glaður þegar hann hafði skriðið út um gat á borkrónunni, eftir að hafa stýrt þessu risavaxna tæki gegnum síðasta haftið í frárennslisgöngum Kárahnjúkavirkjunar. Hann hafði reyndar tvöfalt efni til að fagna því í gærkvöldi mistókst að opna göngin en í morgun gekk allt eins og í sögu.

Gegnumbroti bors 3 í aðrennslisgöngum Kárahnjúkavirkjunar var í dag frestað til morguns þegar ljóst varð að starfsmenn Impregilo þyrftu lengri tíma til að gera við bilun í bornum. Tugir starfsmanna og gesta höfðu þá beðið í þrjá tíma inni í göngunum eftir að borinn yrði ræstur.

Starfsmenn Impregilo eru búnir að slá upp tjöldum yfir brún Kárahnjúkastíflu að hluta og ætla að nota skjólið þar til að hefja framkvæmdir við að reisa svokallaðan ölduvegg.

Vatnsborð Hálslón var í dag komið í 560,1 metra yfir sjávarmáli. Það þýðir að vatnsdýptin næst Kárahnjúkastíflu var 106 metrar.

Ætla má að aðrennslisgöng Kárahnjúkavirkjunar opnist til fulls fljótlega eftir helgina úr Hálslóni alla leið niður í Fljótsdal. Bor 3 átti 84 metra ófarna í lok síðustu viku og við blasir að hann ,,slái í gegn" fljótlega eftir helgi.

Gert er ráð fyrir að prófa botnlokur Hálslóns föstudaginn 8. desember næstkomandi. Botnlokurnar hafa ekki verið hreyfðar frá því byrjað var að safna vatni í Hálslón í lok september.

Bor 3 þokast áfram og skilaði 75 metrum í síðustu viku. Þá voru eftir nákvæmlega 200 metrar í aðrennslisgöngunum og allt útlit fyrir að þessum áfanga verði ekki lokið fyrr en í jólamánuðinum. Áætlað var að ,,slá í gegn" núna í nóvember en bergþéttingar og bergstyrkingar hafa reynst meiri og tímafrekari á leið borsins en gert var ráð fyrir.

Starfsmaður króatísks verktakafyrirtækis á vegum Landsnets lést í vinnuslysi á Fljótsdalsheiði í gærmorgun þar sem verið var að leggja byggðalínuna að norðan á nýjum stað áleiðis að tengivirki í Fljótsdal. Í gærkvöldi slasaðist svo kínverskur starfsmaður Impregilo alvarlega á Kárahnjúkastíflu og liggur þungt haldinn á Landspítala-háskólasjúkrahúsi í Reykjavík.

Stjórn Landsvirkjunar samþykkti í dag að veita Ómari Ragnarssyni 8 milljónir króna til stuðnings kvikmyndar sem hann er að gera um Hálslón.

Hálslón er komið í 559,4 metra yfir sjávarmáli. Mesta dýpið næst Kárahnjúkastíflu er þá 105,4 metrar.

Vatnsborð Hálslóns var komið í 558,5 metra yfir sjávarmál í gær, 16. nóvember 2006 og hafði þá einungis hækkað um 1,2 metra á einni viku eða um 17 sentimetra á sólarhring að jafnaði. Þetta segir allt um veðráttuna á svæðinu nú um stundir: það er hörkuvetur á hálendinu norðan Vatnajökuls!

Lóðrétt þrýstijöfnunargöng við Hálsufs á Fljótsdalsheiði hafa verið boruð og næstu vikurnar verður unnið að því að styrkja bergið í þeim. Þá verður göngin stálfóðruð neðst.

,,Hálslón verður griðastaður heiðagæsa í sárum og lónið fengsælt veiðivatn þegar fram í sækir," segir Sverrir Scheving Thorsteinsson, jarðfræðingur og jöklafræðingur á Höfn í Hornafirði, í Morgunblaðinu í dag. Hann segir að öll umræða um Hálslón og Kárahnjúkavirkjun hafi verið neikvæð og að ósekju megi því skjóta inn jákvæðum punktum til að ,,skoða með opnum huga án þess að láta fordóma vera í vegi fyrir sér."

Starfsmenn Impregilo hafa lokið við að fylla í topp Kárahnjúkastíflu næst Fremri-Kárahnjúki og því er nú komin tvíbreið akstursleið stífluenda á milli. Þessi vegur er einungis opinn starfsmönnum á virkjunarsvæðinu en almenningi verður heimiluð umferð um hann næsta sumar.

Vatnsborðið í Hálslóni er komið í ríflega 557 metra hæð yfir sjávarmáli (tölur frá því í gær, fimmtudag 9. nóvember). Þar með er mesta dýpt næst Kárahnjúkastíflu um 103 metrar.

Starfsmenn Impregilo hafa nú dregið stærstu hluta bors 1 út úr aðrennslisgöngunum aðgöngum við Axará. Borinn verður nú tekinn í sundur og fluttur úr landi þegar þar að kemur.

Vatnsborð Hálslóns var í dag komið í rúmlega 556 metra hæð yfir sjávarmáli.

Starfsmenn á framkvæmdasvæði Kárahnjúkavirkjunar eru yfirleitt ánægðir með marga mikilvæga þætti vinnumhverfis síns, meðal annars öryggismál, samskipti á vinnustað og samskipti við yfirmenn. Þetta kemur fram í niðurstöðum umfangsmikillar viðhorfskönnunar frá síðastliðnu sumri.

atnsborð Hálslóns er komið í 555 metra hæð yfir sjávarmáli. Rennsli Jöklu hefur verið nokkuð umfram það sem gerist í meðalári sem sést best á því að upphaflega var búist við að lónið næði núverandi hæð í byrjun desember.

Þrír refir sýndu á sér nýja hlið í morgun þegar þeir birtust óvænt á hlaðinu hjá Suðurverki í þeim tilgangi einum að sýna sig og sjá aðra. Þeir fylgust áhugasamir með fuglum fá sér í gogginn af fóðri sem stráð hafði verið í snjóinn og sýndu ekki af sér neinn ótuktarskap.

Bor 1 hefur nú verið tekinn í sundur inni í aðrennslisgöngunum og verður nú dreginn út undir bert loft þar sem hann verður búinn undir flutning úr landi.  Hann lauk við að bora sinn hluta ganganna 9. september síðastliðinn.

 Veturinn er genginn í garð á hálendinu og það svo um munar. Í dag var 14 gráðu frost og snjór yfir öllu, stillt og fallegt um að litast.

Vatnsborð Hálslóns er komið í 554 metra hæð yfir sjávarmáli og þar með er mesta dýpi næst Kárahnjúkastíflu nákvæmlega 100 metrar.

Framkvæmdum við botnrás Ufsarstíflu hefur miðað vel eins og sjá má á myndum sem Þorvaldur Konráðsson tók á vinnusvæðinu núna í vikunni. Verktakafyrirtækið Arnarfell annast þennan verkþátt og marga fleiri sem tengjast Jökulsárveitu Kárahnjúkavirkjunar.

Vatnsborð Hálslóns var í dag komið í rúmlega 552 metra yfir sjávarmáli. Mesta dýptin næst Kárahnjúkastíflu er þar með orðin 98 metrar og flatarmálið yfir 10 ferkílómetrar.

Verkinu við að steypa 25 metra langan tappa í hjáveitugöngin undir Kárahnjúkastíflu miðar vel. Engar óvæntar breytingar mælast í stíflunni eða í berginu undir henni og vatnsleki gegnum stífluna er afar lítill.

Heilboruðu þrýstijöfnunargöngin við Hálfsufs á Fljótsdalsheiði voru orðin 130 metra há í lok síðustu viku. Þau verða alls 200 metrar, lóðrétt og 5 metrar í þvermál, þannig að þar er einungis eftir um fjórðungur leiðarinnar úr aðrennslisgöngunum upp á yfirborð jarðar.

Vatnsborð Hálslóns var í dag komin í rúmlega 550 metra hæð yfir sjávarmáli. Rennslið inn í lónið mælist um 120 rúmmetrar á sekúndu og fer minnkandi, enda komið frost á hálendinu með tilheyrandi skæni á lónið.

Vatnsborð Hálslóns er komið í 549 metra hæð yfir sjávarmáli og stefnir í að ná 550 metrum á morgun eða mánudag.

Það er unnið víða á virkjunarsvæðinu við Kárahnjúka allan sólarhringinn. Alltaf er eitthvað um að vera víðast hvar hvort sem er nótt eða dagur.

Vatnsborð Hálslóns var í morgun komið í 546 metra yfir sjávarmáli, sem þýðir að mesta dýpi næst Kárahnjúkastíflu er um 92 metrar. Vatnsborðið hækkaði um 2 metra á sólarhring að jafnaði í síðustu viku en nú hefur kólnað á hálendinu og vatnið hækkar um einn metra á sólarhring að jafnaði.

Fátt gleður augað eins mikið og ljósmynd þegar sá er á myndavélinni heldur hefur lag á að horfa á hlutina frá óvæntum sjónarhornum eða fanga rétta augnablikið. Vandalaust væri að setja upp  sýningu á ljósmyndum starfsmanna við Kárahnjúka, eins og vanagestir þessarar heimasíðu geta borið vitni um. 

Smáskjálftamælanet Veðurstofu Íslands við Kárahnjúka er svo næmt fyrir umhverfi sínu að umferð tækja í tengslum við framkvæmdirnar greinist þar sem einskonar „suð“ sem svo hverfur í matartímum á vinnusvæðinu! Engar hræringar af neinu tagi hafa hins vegar komið fram sem rekja má til stíflumannvirkja eða Hálslóns.

Vatnsborð Hálslóns var í morgun komið í 544 metra hæð yfir sjávarmáli. Dýptin við Kárahnjúkastíflu er þar með orðin réttir 90 metrar.

Fljótt skipast veður í lofti, ekki síst á hálendinu. Við Kárahnjúka skein sól í hægviðri í gær, í morgun var þar hvítt yfir að líta og hrollkalt.

Vatnsborð Hálslóns er í dag (föstudag) komið upp í 537 metra hæð yfir sjávarmáli, sem jafngildir um 80 metra dýpi næst Kárahnjúkastíflu. Lónið er yfir 6 ferkílómetrar að flatarmáli.

Jón Sigurðsson, iðnaðarráðherra, flytur Alþingi í dag munnlega skýrslu um framkvæmdir við Kárahnjúkavirkjun.

Desjarárstífla er nú komin í 623 metra hæð yfir sjávarmál og vantar 7 metra upp á að stíflan nái fullri hæð. Unnið er af krafti við báðar hliðarstíflur Hálslóns enda hefur viðrað afar vel til útiverka undanfarnar vikur.

Hálslón er orðið yfir 5 ferkílómetrar að stærð. Vatnið er nú komið upp fyrir neðri brún aðrennslisganganna sem liggja úr lóninu niður í Fljótsdal.

Lokið er við að steypa fyrsta hluta ,,tappans" í hjáveitugöngin undir Kárahjúkastíflu, innan við lokurnar sem rennt var fyrir að morgni 28. september þegar byrjað var að safna vatni í Hálslón. Tappinn verður um 25 metrar, þar af er búið að steypa 8 metra.

Hálslón teygir sig nú inn að Kringilsá, hálfa leið inn að jökli, og er orðið hálfur fjórði ferkílómetri að flatarmáli. Brátt flýtur yfir botnrásaropið á vesturbakkanum.

Vatnið í Hálslóni steig i gærkvöld upp fyrir op botnrásar lónsins á vesturbakkanum.

Byrjað er að bora nær 200 metra há þrýstijöfnunargöng við Hálsufs á Fljótsdalsheiði, úr aðrennslisgöngunum frá Hálslóni upp á yfirborðið. Gert er ráð fyrir að verkið taki um tvær vikur.

Bor 2 var stöðvaður í aðrennslisgöngunum um helgina og þar með hefur hann lokið sínu hlutverki í þeim þætti virkjunarframkvæmdanna. Bor 3 heldur áfram og lýkur því sem eftir er í heilboruðu göngunum milli Hálslóns og Fljótsdals.

Hálslón stækkar og stækkar. Í dag var bjartara yfir en verið hefur frá því hjáveitugöngunum var lokað á fimmtudagsmorguninn. Starfsmenn framkvæmdaeftirlitsins brugðu sér í sunnudagssiglingu um lónið og sendu nokkrar myndir.

Þokan, sem grúft hefur yfir á hálendinu norðan Vatnajökuls dögum saman, er loksins á förum og þá viðrar betur til að taka myndir af nýju landslagi sem verður til með Hálslóni.