Starfsmenn Slippstöðvarinnar ehf. á Akureyri hófu í gær að koma fyrstu beygjueiningunni á sinn stað í öðrum tveggja fallganga Kárahnjúkavirkjunar. Þeir höfðu áður lokið við að koma fyrir og steypa niður beygjustykkin í hinum fallgöngunum.

Hausthretið hægði nokkuð á sumum þeim verkþáttum virkjunarframkvæmdanna sem eru hvað viðkvæmastir fyrir kulda og snjó. Hins vegar er nú spáð betri tíð og hjólin ættu þá að geta snúist hraðar á nýjan leik.

Landsvirkjun býður nemendum í grunnskólum landsins að taka í vetur þátt í samkeppni um verkefni varðandi orkumál. Verðlaunatillögurnar verða settar í blýhólk og fulltrúar grunnskólanema aðstoða forseta Íslands síðan við að koma honum fyrir í hornsteini Kárahnjúkavirkjunar vorið 2006.

Þýska fyrirtækið DSD Stahlbau GmbH hefur formlega sagt upp samningi við Slippstöðina á Akureyri vegna vinnu við Kárahnjúkavirkjun. Slippstöðin, sem var undirverktaki DSD,  fékk á dögunum heimild til greiðslustöðvunar.

Starfsmönnum verktakafyrirtækisins Arnarfells miðar vel við verkþættina sem varða svokallaða Ufsarveitu. Unnið er að gangagerð og inntaksskurð.

Oftar en ekki er gripið til staðhæfinga sem ekki standast nánari skoðun, segir Friðrik Sophusson, forstjóri Landsvirkjunar, í grein í Morgunblaðinu 12. september 2005. Hann rekur þar ýmsar fullyrðingar úr þjóðmálaumræðunni undanfarið varðandi Kárahnjúkavirkjun og bendir á staðreyndir málsins.

Lokið er við að steypa 10.650 fermetra af vatnskápunni á Kárahnjúkastíflu sem er ríflega þriðjungur þess sem á að framkvæma af þessum verkþætti fyrir áramót.

Metafköst voru við fyllingu Kárahnjúkastíflu í síðustu viku. Alls bættust við 147.000 rúmmetrar í  stífluna og þar með eru komin í hana 67% fyllingarefnisins.

Alls hafa liðlega tíu þúsund gestir komið í Végarð í Fljótsdal í ár til að skoða sýningu Landsvirkjunar um Kárahnjúkavirkjun. Talan miðast við lok ágústmánaðar og er ívið hærri en á sama tíma í fyrra.

Iðnaðarnefnd Alþingis lenti í snemmbúnu hausthreti á við Kárahnjúka í gær þegar hún var á kynnisferð um virkjunarsvæðið. Alhvítt varð á skammri stundu og þæfingsfærð á kafla á Fljótsdalsheiðinni á heimleiðinni.

Rústir þriggja húsa á Hálsi við Kárahnjúka eru meira en þúsund ára gamlar. Þetta er staðfest með niðurstöðum rannsókna á öskulögum.

Sautján Pólverjar komu á dögunum til landsins til starfa hjá Suðurverki hf. við Kárahnjúka. Fyrirtækið auglýsti eftir mannskap hér heima viku eftir viku en hafði ekki árangur sem erfiði.

Framkvæmdir við Desjarárstíflu hafa gengið vel í sumar og á næstu dögum taka starfsmenn Suðurverks hf. upp þráðinn frá síðastliðnum vetri og halda áfram að flytja fyllingarefni í Sauðárdalsstíflu. Þetta eru hliðarstíflur stóru Kárahnjúkastíflunnar og saman munu þær mynda Hálslón Kárahnjúkavirkjunar.

Vinna við að flytja fyllingarefni í Kárahnjúkastíflu gengur afar vel um þessar mundir. Mannvirkið hefur því tekið verulegum breytingum á fáum vikum og er komið á stórum kafla upp í 580 metra hæð yfir sjó.

Kínverskar konur stýra völturunum sem sjást á meðfylgjandi mynd af framkvæmdum við Kárahnjúkastíflu. Þær þjappa fyllingarefnið í lögum og þykja af afbrigðum nákvæmar og vandvirkar sem sést best á því að fyllingin stenst undantekningarlaust prófanir framkvæmdaeftirlitsins.

Starfsmenn verktakafyrirtækisins Arnarfells hófu á dögunum vinnu við hjáveitumannvirki Jökulsár í  Fljótsdal. Þeir munu grafa skurð og göng í stæði væntanlegrar Ufsarstíflu austan árinnar og þar kemur áin til með að renna á meðan sjálf stíflan rís.

Gjóskulagarannsóknir hafa leitt í ljós að rústir, sem Páll Pálsson frá Aðalbóli fann á sínum tíma á Hálsi við Kárahnjúka, eru frá því um 950. Fornleifafræðingar hafa grafið upp rústirnar og rannsakað þær í sumar.

Björn Bjarnason, dómsmálaráðherra, fór um Kárahnjúkasvæðið núna í vikunni og kynnti sér virkjunarframkvæmdirnar.

Lokið er við að steypa niður sográs og snigil  einnar af sex vélum í stöðvarhúsi Kárahnjúkavirkjunar. Steypuvinnan þar gengur samkvæmt áætlun.

Andstæðingar framkvæmda á Austurlandi segja að þær hafi neikvæð áhrif á stöðu útflutningsatvinnugreina á Íslandi og tala um ,,Kárahnjúkavanda" í því sambandi. Stefán Pétursson, framkvæmdastjóri fjármálasviðs Landsvirkjuna, fjallar um þessa fullyrðingu í eftirfarandi grein, sem birtist á heimasíðu Landsvirkjunar í ágúst 2005.

Vatnið í Jökulsá á Dal (Jöklu) hefur frekar sjatnað en hitt síðasta sólarhringinn en mikið rennsli er samt enn í ánni og það kann að aukast á nýjan leik í hlýindunum á hálendinu dag eftir dag.

Borvél 1 gengur afar vel um þessar mundir og boraði 208 metra í síðustu viku, sem er vel yfir áætluðum meðalafköstum.

Lögregla á Austurlandi og embætti ríkislögreglustjóra höfðu síðastliðna nótt afskipti af hópi fólks sem hlekkjaði sig við vinnuvélar á Kárahnjúkasvæðinu og skemmdi eigur verktaka og annarra. Skemmdarverkin verða kærð. Leyfi fyrir tjaldbúðum í landi Valþjófsstaðar var í dag afturkallað og tjaldbúum gert að hverfa á braut.

Starfsmaður Impregilo slasaðist snemma í morgun á virkjunarsvæðinu við Kárahnjúka þegar hann varð fyrir flutningalest í aðrennslisgöngunum inn af aðgöngum 1.

Alls eru nú komnar 4,5 milljónir rúmmetra af fyllingarefni í Kárahnjúkastíflu og verkið er þar með liðlega hálfnað.

 Vel gengur að leggja steypta klæðingu vatnsmegin á Kárahnjúkastíflu. Verkið hófst 23. júní og framgangur þess er eins og til var stofnað.

Alls hafa um 4.300 gestir komið í Végarð í Fljótsdal  það sem af er sumri til að skoða Kárahnjúkasýninguna, fá upplýsingar um virkjunarframkvæmdirnar og fleira sem þar er aðgengilegt í máli og myndum.

Verktakafyrirtækið Arnarfell ehf. átti lægsta tilboð í gröft og gangagerð vegna botnrásar Ufsarstíflu, tæplega 96 milljónir króna eða 59% af kostnaðaráætlun. Tilboð voru opnuð hjá Landsvirkjun í dag.

Starfsmenn Impregilo hafa lokið við að steypa fóðringu í helming kafla í aðrennslisgöngum Kárahnjúkavirkjunar næst vatnsinntakinu í Hálslóni. Fyrsti kílómetri aðrennslisganganna frá inntakinu var sprengdur og grafinn á hefðbundinn hátt og verður heilfóðraður með steypu sem lögð er með risavöxnu stálmóti.

Borvél 3 við Kárahnjúka á eftir að heilbora rúman kílómetra aðrennslisganga að Hálslóni en nú hefur verið ákveðið að láta gott heita á þeim stað, snúa vélinni við og bora í hina áttina. Hún hefur borað um 8 kílómetra frá upphafi verks vorið 2004.

Verktakafyrirtækið Arnarfell frá Akureyri hefur samið við björgunarsveitina Hérað á Egilsstöðum um viðbúnað á vinnusvæði sínu eystra þar til framkvæmdum þar lýkur. Jafnframt gaf fyrirtækið björgunarsveitinni fullbúinn björgunarbíl í viðurkenningarskyni fyrir ómetanlegt starf sem björgunarsveitarmenn landsins vinna.

Kárahnjúkastífla, aðalstífla Hálslóns, fær nú á sig meiri svip með degi hverjum.Um 87 þúsund rúmmetrar af fyllingarefni voru keyrðir í stífluna í síðustu viku og er nú um helmingur byggingarefnis nú kominn í þessa stærstu grjótstíflu í Evrópu.