Jökulsá á Dal stífluð við Fremri-Kárahnjúk

• 193 metra há grjótstífla með steyptri klæðningu á vatnshliðinni við syðri enda Hafrahvammagljúfra.
• Beggja vegna koma hliðarstíflur: Sauðárdalsstífla og Desjarárstífla.
• Stíflurnar mynda Hálslón; vatnsborð í 625 metra hæð yfir sjó þegar það er fullt og flatarmál 57 ferkílómetrar.

Tvær 420 kV háspennulínur, hvor um sig 53 kílómetra löng, flytja raforkuna úr Fljótsdal til álversins í Reyðarfirði. Línurnar liggja samhliða þvert fyrir Múlann, út Fljótsdal að austanverðu og upp á Víðivallaháls, Hallormsstaðaháls og austur í Skriðdal. Þar ,,skilja leiðir” línanna um sinn til að auka flutningsöryggi. Önnur verður lögð um Hallsteinsdal en hin um Þórudal en þær koma saman í Áreyjardal í Reyðarfirði, þvera botn fjarðarins og liggja ofan þorpsins að álverinu á Hrauni.

Áform um orkuöflun vegna stóriðju á Austurlandi breyttust nokkuð við það að samningar tókust við bandaríska fyrirtækið Alcoa um að reisa álver í Reyðarfirði. Ástæðan er sú að álver Alcoa verður minna en Reyðarál (í eigu Norsk Hydro og íslenskra fjárfesta) hugðist reisa: 295 þúsund tonna ársframleiðsla í stað 360-420 þúsund tonn. Kárahnjúkavirkjun mun því anna orkuþörf Alcoa-versins.  Ef álver Reyðaráls hefði hins vegar risið í fullri stærð hefði Kárahnjúkavirkjun ekki annað orkuþörf þess og þurft hefði að sækja viðbótarorku í Kröflu og Bjarnarflag.

Alþingi samþykkti heimildarlög um Kárahnjúkavirkjun með yfirgnæfandi meirihluta atkvæða snemma árs 2002 og iðnaðarráðherra gaf út virkjunarleyfi í september sama ára. Undirbúningur virkjunar hófst síðla árs 2002 með lagningu vega og fleiri framkvæmdum á svæðinu. Sveitarstjórnir Norður-Héraðs og Fljótsdalshrepps gáfu út framkvæmdaleyfi í febrúar 2003.  Sjálfar virkjunarframkvæmdirnar hófust svo fljótlega eftir að undirritaðir höfðu verið orkusölusamningar íslenska ríkisins, Alcoa, Landsvirkjunar og Fjarðabyggðar á Reyðarfirði 15. mars 2003.

Gert er ráð fyrir að byrjað verði að safna vatni í Hálslón í september 2006 og að Kárahnjúkavirkjun fari að framleiða orku fyrir álver Alcoa á Reyðarfirði í apríl 2007. Veitur af Múla og Hraunum verða síðustu þættir virkjunarframkvæmdanna og ætlunin er að ljúka þeim í apríl 2009.