Laugardagur 23. júní 2007

Starfsmenn Fljótsdalsstöðvar eru alls 11: stöðvarstjóri, viðhaldsstjóri og níu stöðvarverðir. Þeir ganga vaktir allan sólarhringinn, árið um kring, sinna viðhaldi og eftirliti með rafbúnaði og grípa inn í atburðarásina ef eitthvað bregður út af í samvinnu við stjórnstöð Landsnets í Reykjavík.

Stöðvarhúsið er jafnan lokað almenningi. Boðið verður samt upp á skoðunarferðir í hópum með leiðsögumanni tvisvar til þrisvar á dag á sumrin. Áhugamenn um slíkt hafi samband við umsjónarmenn upplýsingamiðstöðvar Landsvirkjunar í Végarði í Fljótsdal.

Orkuvinnsla í Fljótsdalsstöð hófst 2. apríl 2007 og þann dag fóru starfsmenn Landsvirkjunar sömuleiðis að hafa fasta viðveru allan sólarhringinn í Fljótsdal. Þetta telst með öðrum orðum vera eiginlegt upphaf starfsemi í stöðinni og fyrir lá þá þegar formlegt starfsleyfi frá Heilbrigðisnefnd Austurlands, gefið út 27. mars 2007.

• Skrifað var undir samninga um gerð stöðvarhússhvelfingar í Fljótsdal 9. september 2003.
• Í desember 2004 var lokið við að grafa og byrjað að steypa í stöðvarhússhellinum í Valþjófsstaðarfjalli.
• Ólafur Ragnar Grímsson forseti Íslands lagði hornstein aðstöðvarhúsi Kárahnjúkavirkjunar 11. maí 2006 og við sama tækifæri gaf Gunnþórunn Ingólfsdóttir, oddviti Fljótsdalshrepps, stöðvarhúsinu heitið Fljótsdalsstöð. Forsetinn lagði í hornsteininn blýhólk sem í eru meðal annars skjöl með sjónarmiðum andstæðinga Kárahnjúkavirkjunar annars vegar og Landsvirkjunar hins vegar varðandi undirbúning og ákvörðun um Kárahnjúkavirkjun.