Miðvikudagur 17. september 2008

Jökulsár- og Hraunaveitur eru síðari hluti framkvæmda við Kárahnjúkavirkjun og gert ráð fyrir að ljúka þeim á árinu 2009. Ætla má að vatn af þessu svæði austan Snæfells nýtist til að framleiða að jafnaði um fjórðung raforku frá Fljótsdalsstöð.

Veiturnar austan Snæfells eru nauðsynlegar til að tryggja rekstraröryggi Fljótsdalsstöðvar hvernig svo sem viðrar til vatnsbúskapar á hálendinu.

Meginþættir Jökulsár- og Hraunaveitna eru lón og göng til að beina vatni úr Jökulsá í Fljótsdal, Kelduá, Grjótá, og Innri-Sauðá inn í stóru aðrennslisgöngin á milli Hálslóns og Fljótsdalsstöðvar. Þar er helst að nefna

• Ufsarlón, eins ferkílómetra inntakslón sem varð til með því að stífla Jökulsá í Fljótsdal um 2 km neðan við Eyjabakkafoss, og 13,5 km löng göng sem tengja lónið við stóru aðrennslisgöngin. Þegar Ufsarlón er fullt er vatnsborð þess í 625 hæð yfir sjávarmáli, nákvæmlega jafnhátt og vatnsborð Hálslóns.
• Kelduárlón, átta ferkílómetra miðlunarlón sem verður til með því að stífla Kelduá og 1.8 km göng milli Kelduárlóns og Ufsarlóns.
• Grjótárlón og tæplega 1.7 km göng milli Grjótárlóns og Kelduárlóns.
• Innri-Sauðárlón og veituskurðir milli Sauðárvatns og Innri-Sauðár og milli Innri-Sauðár og Grjótár.

Yfirlitskort. Hringur dreginn um Jökulsár- og Hraunaveitur. Hálslón til vinstri og Lagarfljót efst til hægri á myndinni. Bláa punktalínan táknar aðrennslisgöng Kárahnjúkavirkjunar.