1. vatnsaflsvirkjun á Austurlandi (Kárahnjúkavirkjun) sem Landsvirkjun (og/eða hlutafélag að fullu eða að hluta í eigu Landsvirkjunar) byggi og reki,
2. verksmiðju til vinnslu á áli í Reyðarfirði á Austurlandi, ásamt nauðsynlegri aðstöðu, sem íslenskt hlutafélag eða annað fyrirtæki stofnað af hálfu Alcoa í þeim tilgangi byggi og reki (álfyrirtækið),
3. lóð undir álverið á eignarlandi ríkissjóðs við Mjóeyri í Reyðarfirði,
4. hafnarmannvirki við Mjóeyri, sem sveitarfélagið Fjarðabyggð (sveitarfélagið) leggi til og hafnarsjóður þess (hafnarsjóður) byggi og reki og
5. aðra tengda aðstöðusköpun.
   

Verkefnið hefur verið til athugunar á Íslandi um nokkurt skeið og var til umræðu á árunum 2000-2001 milli ríkisstjórnarinnar, sveitarfélagsins og Landsvirkjunar annars vegar og Reyðaráls hf. hins vegar (Reyðarál), íslensks hlutafélags, sem Hæfi hf. í Reykjavík (Hæfi) stofnaði ásamt Hydro Aluminium a.s. í Osló, og unnu aðilarnir víðtækt undirbúningsstarf. Þessum viðræðum hefur nú verið slitið að svo komnu, og ríkisstjórnin, sveitarfélagið og Landsvirkjun eru reiðubúin til að ganga til einkaviðræðna um verkefnið við Alcoa, og hafa í þeim tilgangi sett á laggirnar sérstaka nefnd eftir tilnefningu iðnaðarráðherra.

Ríkisstjórnin og sveitarfélagið hafa hug á að nýta virkjanlegar orkulindir, örva efnahagslífið á Austurlandi og tryggja áframhaldandi efnahagsvöxt og þjóðhagslegan stöðugleika.

Alcoa er leiðandi aðili á heimsvísu í framleiðslu á áli, fullunnu áli og súráli. Fyrirtækið starfar á öllum helstu sviðum áliðnaðarins – tækni, námuvinnslu, hreinsun, bræðslu, orkuframleiðslu, úrvinnslu og endurvinnslu. Alcoa hefur áhuga á að auka framleiðslugetu sína á áli og telur að þátttaka í verkefninu falli vel að langtímamarkmiðum sínum.

Landsvirkjun starfar að afhendingu á raforku í heildsölu til almenningsrafveitna og iðnfyrirtækja á Íslandi, og er fyrirtækið reiðubúið til samkomulags um afhendingu rafmagns til álversins á langtímagrundvelli.

Í ljósi þessa hófust snemma í apríl 2002 könnunarviðræður um möguleika á að Alcoa kæmi að verkefninu, og hinn 19. sama mánaðar var samþykkt og undirrituð VIÐRÆÐUÁÆTLUN (Joint Action Plan eða JAP) milli Alcoa og Fjárfestingarstofunnar – orkusviðs (Fjárfestingarstofan), sem ríkisstjórnin og Landsvirkjun eru eigendur að. Markmiðið var að gera Alcoa kleift að vinna frumáætlun um verkefnið og kveða á um samstarf Fjárfestingarstofunnar og eigenda hennar við mat á hagkvæmni álverkefnisins og um önnur mál varðandi framkvæmd þess og verkefnisins í heild, og hefur Alcoa síðan varið umtalsverðum tíma og fjármunum til vinnu að málinu. Breytingar voru gerðar á viðræðuáætluninni og hún framlengd með samkomulagi milli Alcoa og Fjárfestingarstofunnar hinn 23. maí 2002, til þess að Alcoa gæti gert vissar viðbótarathuganir áður en álverkefnið yrði lagt fyrir stjórn fyrirtækisins til fyrstu umfjöllunar. Stjórn Alcoa fjallaði um álverkefnið á fundi sínum 11.-12. júlí 2002, og hefur hún staðfest áframhaldandi áhuga Alcoa á því og veitt æðstu framkvæmdastjórn Alcoa heimild til að stíga þau skref, sem lýst er í yfirlýsingu þessari.

Samhliða athugunum þessum og samstarfi hefur Alcoa átt viðræður um það við Hæfi, hvernig tryggja megi réttinn að grunnvinnu þeirri og niðurstöðum, sem Reyðarál hafði áður unnið í tengslum við álverkefnið. Á sama tíma hefur Alcoa átt könnunarviðræður við Landsvirkjun um skilyrði orkuafhendingar, jafnframt því að gera áreiðanleikakönnun til bráðabirgða á álverkefninu, þar á meðal varðandi aðstæður á lóðinni, hafnaraðstöðu, aðgengi að vegakerfi, almenna þjónustu og aðra aðstöðuþörf, forsendur raforkuflutnings til álversins og umhverfismál varðandi álverið og fyrirhuguð virkjunarmannvirki.

Til að auðvelda Landsvirkjun að hefja nú þegar tilteknar undirbúningsframkvæmdir á virkjunarsvæði Kárahnjúkavirkjunar, sem vinna verður um sumarið og haustið 2002 ef halda á í þann möguleika að raforka verði tiltæk fyrir álverið snemma árs 2007 eða fyrr, hafa Alcoa og Landsvirkjun í dag gert með sér samkomulag (samning um kostnaðarhlutdeild) um að Alcoa beri hluta þeirrar fjárhagsáhættu, sem Landsvirkjun tekur með því að ráðast í þessa vinnu, án þess þó að hlutdeildin feli í sér skuldbindingu um framkvæmd álverkefnisins eða verkefnisins í heild að öðru leyti.

Það er rökstudd skoðun aðila að yfirlýsingu þessari að niðurstöður þeirrar frumathugunar og samvinnu, sem fram hefur farið á grundvelli viðræðuáætlunarinnar, gefi tilefni til áframhaldandi samstarfs að verkefninu með það fyrir augum að ljúka hagkvæmnisathugun á álverkefninu og endurskoða tímasetningar og önnur atriði varðandi hinar tengdu virkjunarframkvæmdir, hafnarmannvirki og aðra aðstöðu, og eiga jafnframt viðræður um viðskiptalegar og aðrar forsendur að fjárfestingu Alcoa í álverkefninu og framkvæmd verkefnisins í heild í gagnkvæmri og góðri trú.

Í samræmi við þetta samþykkja ríkisstjórnin, Landsvirkjun og Alcoa (aðilarnir) eftirfarandi sameiginlega viljayfirlýsingu, í þeim tilgangi að setja fram óskir sínar, áætlanir og skuldbindingar varðandi verkefnið, þar á meðal hugsanlega byggingu álversins á Reyðarfirði (álverið).

Í trausti þeirra skuldbindinga sem að neðan greinir, ganga aðilarnir til eftirfarandi samkomulags:

1. VERKEFNIÐ

Ríkisstjórnin (sem gætir jafnframt hagsmuna sveitarfélagsins), Landsvirkjun og Alcoa munu halda áfram viðræðum um möguleikann á því að Alcoa fjárfesti í álverinu á Íslandi. Með yfirlýsingu þessari samþykkja aðilar að taka þau skref, sem lýst er í stuttu máli hér að neðan, til þess að meta og ræða þær ráðstafanir og samninga sem nauðsynlegir eru og viðeigandi í tengslum við byggingu og rekstur álversins og til þess að gera þeim kleift að taka endanlega ákvörðun um framkvæmd verkefnisins.

Sem stendur er ráðgert að álverið hafi framleiðslugetu sem svarar um 295.000 tonnum á ári af frumbræddu áli, og nýti P817 tækni Alcoa, og að það muni þurfa u.þ.b. 4300 GWst/ári eða 500 MW af raforku á samfelldum grunni samkvæmt samningi til langs tíma.

Til þess að mæta orkuþörf álversins ráðgerir Landsvirkjun að byggja Kárahnjúkavirkjun með uppsettu afli allt að 630 MW, svo sem heimilað hefur verið með lögum frá Alþingi nr. 38 16. apríl 2002.

Ríkisstjórnin og sveitarfélagið Fjarðabyggð munu útvega lóðar- og hafnaraðstöðuna fyrir álverið við Mjóeyri í Reyðarfirði samkvæmt samningum, sem þau gera um þessi efni hvort um sig. Ríkisstjórnin og sveitarfélagið munu einnig takast á hendur að sjá fyrir annarri nauðsynlegri aðstöðu.

2. VERKEFNISMAT OG ÖNNUR STÖRF

Frá dagsetningu yfirlýsingar þessarar munu ríkisstjórnin, Landsvirkjun og Alcoa halda áfram því starfi, sem hófst með viðræðuáætluninni, og samþykkja aðilar að vinna saman að því að gera Alcoa kleift að leggja fullnaðarmat á álverkefnið. Þetta mat af hálfu Alcoa mun fela í sér frekari áreiðanleikakönnun, sem varða mun staðsetningu álversins, byggingarframkvæmdir og þjónustu sem það kallar á, þ.m.t. aðgengi að höfn og byggingu hennar, tengingar við þjóðvegi og mannvirki, aðstöðu til umskipunar og annarrar vörumeðferðar, rafmagns-, gas- og vatnsveituþarfir, virki til meðhöndlunar á föstum úrgangi og vatnsrennsli, mengunarvarnabúnað, vinnuaflsþörf og frekara mat á kröfum samkvæmt viðeigandi lögum og reglugerðum (að meðtöldu samþykki umhverfisyfirvalda og starfsleyfi). Að auki mun Alcoa vinna að greiningu á forsendum orkuafhendingar, sem m.a. mun fela í sér áreiðanleikakönnun á forsendum og viðmiðum varðandi byggingu Kárahnjúkavirkjunar og annarra nýrra orkuvera, nauðsynlegum virkjunum til orkuflutnings að álverinu og skilmálum orkusölunnar til langs tíma. Athugun á skipan eignarhalds og tækifæra í því tilliti verður einnig þáttur í greiningu Alcoa.

Fjárfestingarstofan mun halda áfram að aðstoða aðilana og samhæfa vinnu samkvæmt yfirlýsingu þessari og veita Alcoa allar nauðsynlegar almennar upplýsingar um Ísland.

Jafnframt munu aðilar halda áfram vinnu og gagnkvæmum viðræðum varðandi skilmála þeirra samninga og lagagerninga, sem nauðsynlegir eru fyrir framkvæmd álverkefnisins, svo og varðandi hentuga áfanga eða skref í átt að endanlegri gerð þeirra, og eru þessir samningar þar á meðal:

• Fjárfestingarsamningur milli ríkisstjórnarinnar og Alcoa;
  
• Rafmagnssamningur milli Landsvirkjunar og álfyrirtækisins;
  
• Lóðarsamningur milli ríkisstjórnarinnar og álfyrirtækisins;
  
• Hafnarsamningur milli hafnarsjóðs Fjarðabyggðar og álfyrirtækisins.

Ríkisstjórnin mun halda áfram undirbúningi löggjafar í tengslum við verkefnið, þar á meðal um nauðsynlegar undanþágur frá gildandi lögum, sem um verði samið í væntanlegum fjárfestingarsamningi. Ennfremur mun ríkisstjórnin halda áfram að fjárfesta í vegagerð og öðrum framkvæmdum til aðstöðusköpunar í tengslum við verkefnið.

Landsvirkjun hefur fengið þær lagaheimildir, sem nauðsynlegar eru til að ráðast í Kárahnjúkavirkjun, að undangengnu mati á umhverfisáhrifum sem leitt var til lykta í desember 2001. Er þess vænst að virkjunarleyfi og starfsleyfi fyrir Kárahnjúkavirkjun verði gefin út þegar með þarf. Landsvirkjun mun hefja þá undirbúningsvinnu, sem vísað er til í inngangi hér að framan, og skuldbindur sig til þess að leysa hana af hendi í samræmi við samninginn um kostnaðarhlutdeild og gera þær ráðstafanir sem við þarf á gildistíma yfirlýsingar þessarar til þess að framkvæmdaáætlun um Kárahnjúkaverkefnið geti haldist, en hún miðast við að tryggja álverinu rafmagn snemma árs 2007 eða fyrr. Meðal annars felur þetta í sér að hefja hönnunarvinnu og útgáfu útboðsgagna fyrir samninga um stíflugerð og jarðgangavinnu.

Fyrirhuguð lóð undir álverið er í eigu ríkissjóðs, og verður unnt að veita álfyrirtækinu leigunot af henni þegar á þarf að halda.

Sveitarfélagið og hafnarsjóður munu halda áfram undirbúningi að uppbyggingu hafnar og hafnaraðstöðu við Mjóeyri í Reyðarfirði. Skipulagsstofnun samþykkti mat á umhverfisáhrifum vegna hafnarinnar í ágúst 2001. Gildandi hafnaráætlun, sem samþykkt var á Alþingi í árslok 2001, gerir ráð fyrir fjárveitingu til hafnargerðarinnar.

Með aðstoð Fjárfestingarstofu mun Alcoa vinna að málum varðandi kröfum samkvæmt lögum og reglugerðum í sambandi við álverkefnið, sem og þeim leyfum og heimildum, er afla þarf vegna byggingar álversins og tengdra mannvirkja, og er eftirfarandi þar með talið:

• Gerð Alcoa á loftdreifingarspá varðandi útblástur frá álverinu.
  
• Framkvæmd mats á umhverfisáhrifum varðandi álverið, eftir því sem við á.
  
• Útgáfa starfsleyfis fyrir álverið.
  
• Gerð skipulags og annarra ráðstafana til grundvallar útgáfu byggingarleyfis fyrir álverið.

Við umhverfismat vegna álversins verður tekið mið af því, að þegar hefur farið fram mat á umhverfisáhrifum álverksmiðju með framleiðslugetu allt að 420.000 tonnum á ári, sem ráðgert var að reisa á Reyðarfirði, en í því mati var verksmiðjan samþykkt bæði af hálfu Skipulagsstofnunar og umhverfisráðherra, og að ætla megi, að hin minni verksmiðja muni hafa minni heildaráhrif á umhverfið.

Landsvirkjun, með aðstoð fjármálaráðgjafa sinna, mun hefja aðgerðir til að tryggja að unnt verði að fjármagna Kárahnjúkavirkjun með kjörum sem Landsvirkjun metur ásættanleg og samrýmanleg við fyrirhugaða skilmála orkusölu til álfyrirtækisins samkvæmt rafmagnssamningnum.

Alcoa, með aðstoð Fjárfestingarstofunnar – orkusviðs, eftir því sem við á, mun halda áfram verkfræðivinnu sinni varðandi álverkefnið til að staðreyna fengnar upplýsingar og niðurstöðu sína þess efnis, að verkefnið sé hagkvæmt.

Alcoa og Landsvirkjun lýsa yfir þeim ásetningi að styðja aðgerðir af hálfu ríkisstjórnarinnar og sveitarfélaga til að stofna verndarsvæði, svo sem þjóðgarð, í nágrenni við Kárahnjúkavirkjun, en áform af því tagi hafa verið í athugun hjá umhverfisráðuneytinu. Þótt ákvörðun varðandi umfang og mörk slíks svæðis sé í verkahring ríkisstjórnarinnar og sveitarfélaga, styðja Alcoa og Landsvirkjun hugmyndina í því skyni að stuðla að verndun svæða á borð við Snæfell, öllum hagsmunaaðilum til góða.

Það er sameiginlegt markmið aðila að koma því starfi, sem hér um ræðir, svo langt áleiðis á gildistíma yfirlýsingar þessarar, að stjórnendur Alcoa geti lagt fullnaðaráætlun um álverkefnið fyrir stjórn félagsins til endanlegs samþykkis, að stjórnendum Landsvirkjunar verði kleift að leggja rafmagnssamninginn og önnur málefni fyrir stjórn fyrirtækisins til fullnaðarsamþykkis og að ríkisstjórninni og sveitarfélaginu verði kleift að staðfesta forsendur að þátttöku sinni í verkefninu.

3. TÍMAMÖRK OG GILDISTÍMI

Aðgerðir aðila, sem kveðið er á um hér að framan, munu hefjast um leið og yfirlýsing þessi hefur verið undirrituð og verða leiddar til efnislegra lykta svo fljótt sem við verður komið með raunhæfu móti.

Aðgerðirnar munu miðast við að gera aðilum kleift að móta skýra og gagnkvæmt ásættanlega ákvörðun um heildarmynd verkefnisins og helstu forsendur þess frá tæknilegu, viðskiptalegu og fjárhagslegu sjónarmiði, þannig að fyrir liggi ljósar forsendur til þess að afla þeirra heimilda sem kveðið er á um hér að framan. Meðal annars verður unnið að því að ná gagnkvæmu samkomulagi um forsendur fyrir byggingu og rekstri álversins og hinna nýju orku- og hafnarmannvirkja, um umhverfisþætti verkefnisins og grundvöll langtímasamnings um orkusölu til álversins. Einnig verður leitast við að ná samkomulagi um endanlega texta fjárfestingarsamningsins, lóðarsamningsins og hafnarsamningsins, ásamt þeim öðrum samningum og skjölum sem helst skipta máli við endanlega mótun á heildarmynd verkefnisins.

Verkið verður unnið eins og aðilar koma sér saman um með hliðsjón af þörfum hvers um sig, með það fyrir augum að ljúka vinnu að framangreindum samningum að því marki að meðferð Alþingis á heimildarlöggjöf vegna verkefnisins geti hafist á komandi haustþingi, og verði að því stefnt að ljúka þinglegri meðferð svo fljótt sem aðstæður leyfa.

Stjórnendur Alcoa munu stefna að því að kynna álverkefnið fyrir stjórn félagsins til fullnaðarsamþykkis eigi síðar en á stjórnarfundi í janúar 2003.

Landsvirkjun mun stefna að því að leggja rafmagnssamninginn fyrir stjórn sína og Hafnarsjóður hafnarsamninginn fyrir stjórn sína til fullnaðarsamþykkis eigi síðar en í lok desember 2002.

Fari svo að Alcoa, ríkisstjórninni og Landsvirkjun takist ekki að lyktum að ná samkomulagi um grundvallarforsendur endanlegra og bindandi samninga um framkvæmd álverkefnisins eða um áfanga að slíkum samningum fyrir marslok 2003, fellur yfirlýsing þessi úr gildi, nema aðilar komi sér saman um að framlengja gildistíma hennar eða samþykki nýja í hennar stað.

4. EINKAVIÐRÆÐUR

Við það er miðað, að Alcoa muni áfram verja umtalsverðum tíma og atorku, innan fyrirtækisins sem utan, til þess að ljúka vandaðri og ítarlegri athugun á hagkvæmni álverkefnisins og öðrum málum varðandi verkefnið í heild sinni á gildistíma viljayfirlýsingar þessarar. Með hliðsjón af þessu og í samræmi við markmið þau og skuldbindingar, sem fram koma í yfirlýsingunni, samþykkja ríkisstjórnin og Landsvirkjun að hefja hvorki né eiga hlut að neinum sambærilegum viðræðum eða samvinnu um verkefnið við nokkurn annan aðila á gildistíma viljayfirlýsingar þessarar án undanfarandi skriflegs samþykkis Alcoa.


5. TRÚNAÐUR

Til að að takast á hendur og vinna að þeim málefnum sem um ræðir í yfirlýsingu þessari hafa aðilar óskað eftir og munu óska eftir hver af öðrum, og hafa veitt og munu veita hver öðrum, tilteknar óopinberar trúnaðar- og/eða einkaupplýsingar (“upplýsingarnar”) sem þeir skiptast á í góðri trú að því marki sem efnið er tiltækt eða aðgengilegt þeim aðila sem um ræðir án skuldbindinga um trúnað gagnvart þriðju aðilum, á eftirfarandi forsendum:

(a) Upplýsingarnar verði eingöngu notaðar í tengslum við vinnuna að verkefninu.
(b) Hvort sem samningar takast milli aðila eða ekki munu þeir halda trúnað um upplýsingarnar í þann tíma sem skuldbindingar þær sem um ræðir í yfirlýsingu þessari eru í gildi, og í 3 mánuði eftir að yfirlýsingin fellur úr gildi, nema önnur tímamörk séu samþykkt með gagnkvæmum hætti.
(c) Aðilar munu varna því að upplýsingarnar komist í hendur annarra með því að beita sömu aðferðum til að vernda upplýsingarnar og þeir beita til verndar eigin upplýsingum, sem eru óopinberar eða bundnar trúnaði eða eignarrétti; þó með þeim fyrirvara að ef aðili sem veitir upplýsingar óskar eftir því að viðtakandinn beiti sérstökum aðferðum gegn opinberun (t.d. hömlum gegn afritun), samþykkir viðtakandinn að hann sé bundinn slíkum aðferðum með því að veita upplýsingunum viðtöku, að því tilskildu að aðilinn sem upplýsingarnar veitir leggi fram slíka ósk skriflega á þeim degi eða fyrir þann dag sem upplýsingarnar eru veittar og tilgreini nákvæmlega hvaða upplýsingar skulu háðar hinum sérstöku aðferðum.
(d) Enginn viðtakandi skal sjálfur nota upplýsingarnar, afhjúpa þær, greina frá þeim, gefa þær út, yfirfæra þær eða ljóstra þeim upp með öðrum hætti til nokkurar persónu, fyrirtækis eða annars aðila án undanfarandi skriflegs samþykkis aðilans sem upplýsingarnar veitir, né heimila nokkrum starfsmönnum sínum eða fulltrúum að gera slíkt, að því undanskildu að viðtakanda er heimilt að dreifa upplýsingunum, með fyrirvara um hvers kyns takmarkanir sem settar eru við opinberun skv. c-lið, til ábyrgra stjórnarmanna, yfirmanna, starfsmanna og ráðgjafa viðtakandans eða tengdra aðila sem hafa þörf fyrir upplýsingarnar í þeim tilgangi að meta viðskiptin, að því gefnu að hvers kyns opinberun af völdum slíkra stjórnarmanna, yfirmanna, starfsmanna og ráðgjafa viðtakandans eða tengdra aðila í bága við ákvæði yfirlýsingar þessarar telst brot viðtakandans á yfirlýsingu þessari.
(e) Viðtakandi upplýsinganna skal án tafar skila þeim ásamt öllum afritum og eftirmyndum þeirra sem hann ræður yfir þegar aðilinn sem upplýsingarnar veitir óskar þess. Viðtakandinn samþykkir að staðfesta skriflega fyrir aðilanum sem upplýsingarnar veitir að hann hafi farið að ákvæðum þessarar málsgreinar.
(f) Aðili sem veitir upplýsingar telst ekki með því hafa gefið neinar yfirlýsingar eða veitt neina ábyrgð varðandi upplýsingarnar.
(g) Ef viðtakandi þarf lögum samkvæmt (t.d. vegna vitnisburðar, yfirheyrslu, kröfu um afhendingu skjala, stefnu, uppýsingagjafar í rannsókn fyrir dómi eða sambærilegra atvika) að greina frá einhverjum upplýsinganna, skal hann tafarlaust tilkynna hinum aðilanum, sem upplýsingarnar veitir, skriflega fyrirfram um slíka kröfu til þess að gera þeim aðila sem upplýsingarnar veitti kleift að grípa til varnaraðgerða eða annarra úrræða og/eða lýsa sig óbundinn af ákvæðum yfirlýsingar þessarar. Nái sá aðili sem upplýsingarnar veitir ekki að koma við vörnum eða beita öðrum úrræðum eða ef hann lýsir sig óbundinn af ákvæðum yfirlýsingar þessarar, samþykkir aðilinn sem lögum samkvæmt er skylt að skýra frá upplýsingunum að láta aðeins í té þann takmarkaða hluta upplýsinganna sem honum er skylt samkvæmt lögfræðilegri ráðgjöf og beita öllum ráðum til þess að fá tryggingu fyrir því að slíkar upplýsingar hljóti trúnaðarmeðferð.
(h) Hugtakið ,,upplýsingar“ tekur ekki til upplýsinga sem (i) eru eða krafist er að séu almennt aðgengilegar almenningi á þeim tíma sem frá þeim er greint eða síðar (nema ástæðan sé sú að aðili hafi gert þær þannig aðgengilegar í bága við yfirlýsingu þessa), (ii) voru aðgengilegar einhverjum aðilanna frá öðrum en þeim aðila sem upplýsingarnar veitti, enda hafi viðtakandinn ekki vitað til og viti ekki til að heimildaraðili sinn hafi verið bundinn trúnaðarkvöð sem gilti um upplýsingarnar eða (iii) einhver aðilanna hefur aflað og þróað án þess að brjóta gegn nokkru ákvæði yfirlýsingar þessarar.

6. TILKYNNINGAR

Aðilar eru sammála um að samræma samantekt og birtingu hvers kyns opinberra tilkynninga um efni yfirlýsingar þessarar, með fyrirvara um hvers kyns lagalega upplýsingaskyldu (t.d. skv. reglum bandaríska fjármálaeftirlitsins (U.S. Securities and Exchange Commission) og reglum kauphallarinnar í New York). Hvorki ríkisstjórnin, Landsvirkjun né Alcoa munu greina frá framvindu eða eðli viðræðna þeirra í millum án þess að tilkynna hinum um það fyrirfram. Hver aðili mun tilnefna aðila sem annast samræmingu opinberra tilkynninga.

7. LAUSN DEILUMÁLA

Hvers kyns deilumálum er upp koma í tengslum við yfirlýsingu þessa og aðilar geta ekki leyst sín á milli í sátt skal vísað til gerðardóms og þau leyst þar þegar einhver aðilinn krefst þess. Skulu efnisreglur íslensks réttar gilda um ágreiningsefnið, en um störf gerðardómsins fer að reglum Gerðardómsstofnunar Verslunarráðsins í Stokkhólmi sem í gildi eru á undirritunardegi viljayfirlýsingar þessarar. Reglurnar skulu teljast hluti viljayfirlýsingar þessarar með tilvísun til þeirra, þó með fyrirvara um ákvæði þessa 7. kafla. Gerðardómurinn skal skipaður þremur gerðardómsmönnum og skal einn skipaður af sóknaraðila, annar af gagnaðila og hinn þriðji, sem skal vera formaður dómsins, skal skipaður sameiginlega af þeim tveimur gerðardómsmönnum sem aðilar hafa skipað. Ef sóknaraðili og/eða gagnaðili skipar ekki gerðardómsmann sinn í kröfu sinni og andsvari skal hinum aðila gerðardómsmálsins heimilt að leita til Gerðardómsstofnunar Verslunarráðsins í Stokkhólmi um að skipa viðkomandi gerðardómsmann. Ef gerðardómsmennirnir tveir, sem skipaðir eru af aðilum, geta ekki komið sér saman um þriðja gerðardómsmanninn skal hann skipaður af Gerðardómsstofnun Verslunarráðsins í Stokkhólmi fari einhver aðila fram á það. Þriðji gerðardómsmaðurinn skal hins vegar ekki vera af sama þjóðerni og aðilar samnings þessa, nema aðilar komi sér saman um annað. Gerðardómsmenn skulu fullnægja hæfisskilyrðum 6. gr. laga um samningsbundna gerðardóma nr. 53/1989. Gerðardómsmeðferð skal fara fram í Reykjavík og fara fram á ensku, nema um annað sé samið.

Aðilar skuldbinda sig hér með til að hlíta dómi gerðardóms án tafar og afsala sér rétti sínum til hvers kyns áfrýjunar varðandi ágreiningsatriði um staðreyndir eða lagaleg atriði að því marki sem slíkt afsal er heimilt. Dómar gerðardóms samkvæmt þessum kafla skulu vera endanlegir og bindandi fyrir aðila frá og með þeim degi sem þeir eru kveðnir upp, enda verði þeim framfylgt af dómstólum eða öðrum lögbærum yfirvöldum ef með þarf. Aðilar skulu halda áfram að fullnægja skyldum sínum samkvæmt yfirlýsingu þessari þrátt fyrir hvers kyns deilur, sem vera kunna óleystar þeirra í milli.


8. STAÐA YFIRLÝSINGARINNAR

Aðilar eru sammála um að ákvæði yfirlýsingar þessarar, að undanskildum ákvæðum 4. kafla (Einkaviðræður), 5. kafla (Trúnaður), 6. kafla (Tilkynningar) og 7. kafla (Lausn deilumála), séu bindandi fyrir þá aðeins að því marki sem sérstaklega er fram tekið í yfirlýsingunni og aðeins í tengslum við starf það og aðra viðleitni, sem hverjum þeirra ber að inna af höndum samkvæmt umræddum ákvæðum á gildistíma yfirlýsingarinnar, og að hvers kyns bindandi samningur þeirra í milli varðandi verkefnið verði gerður með fyrirvara um eftirfarandi:

(a) Undirritun endanlegra samninga sem aðilar eru sammála um;
(b) útgáfu nauðsynlegra eða æskilegra opinberra heimilda varðandi verkefnið og hina endanlegu samninga;
(c) samþykki stjórnar Alcoa og stjórnar Landsvirkjunar, sem og samþykki og/eða staðfestingu iðnaðarráðherra og sveitarstjórnarinnar;
(d) samþykki þeirra heimildarlaga á Alþingi sem nauðsynleg eru eða viðeigandi vegna verkefnisins, hvort heldur almennt eða í sérstöku tilliti; og
(e) önnur þau skilyrði er aðilar koma sér saman um.

ÞESSU TIL STAÐFESTU hafa aðilar undirritað yfirlýsingu þessa á þeim degi sem að á neðan greinir.

Undirritað hinn 19. júlí 2002.

RÍKISSTJÓRN ÍSLANDS
Valgerður Sverrisdóttir
Iðnaðarráðherra


ALCOA INC.
G. John Pizzey
Aðstoðarforstjóri


LANDSVIRKJUN
Friðrik Sophusson
Forstjóri